Kupu whakataki / Whakamārama mō te kaupapa
Kua kitea whānuitia ngā hua o ngā momo kaupapa whakarauora reo, arā, ko te nui o ngā kaikōrero Māori puta noa. Heoi, ka tae atu ana te huhua o ngā tauira Māori ki ngā whare ako Pākeha nei te hanga, e wheta tonu ana rātou kia whai i ngā wāhi Māori ake nei te āhua. Mā tēnei kaupapa rangahau ka whāia ētahi rautaki kia tautoko i te puāwaitanga o te reo i ngā whare wānanga Pākeha, kia kitea hoki ngā wero e pā atu ana ki ngā tauira e kore e tuku aromatawai ki te reo.
Te reo revitalisation movements have resulted in increased numbers of bilingual Māori in society. However, as many more students proficient in te reo arrive at universities, they are struggling to find spaces that normalise te reo Māori and tikanga within these institutions. Through wānanga, we will identify barriers and enablers to the use of te reo Māori, thus, providing guidelines for universities and disciplines wishing to improve support for te reo Māori.
Ngā whāinga
Kei te piki haere te nui o ngā tauira reo Māori e whakaeke atu ana ki ngā whare wānanga Pākeha. Ko te wawata ia o tēnei kaupapa rangahau, ka rangona ai e ngā aporei o ngā whare wānanga Pākeha ngā reo, ngā whakaaro, me ngā tirohanga a te tauira reo Māori, kia hua mai ai ngā rautaki e whanake ai, e tupu ora ai te reo Māori i ēnei wāhi. Ko te pātai matua o tēnei rangahau he wetewete:
Me pēwhea ngā whare wānanga e huri ai hei wāhi haumaru e pai ai te tono o ngā aromatawai tohu paetahi ki te reo Māori?
He aha tēnei rangahau i hira ai?
He mea nui te aro ki ngā reo me ngā tirohanga o ngā rangatahi, o ngā tauira Māori, arā, mō te hiranga o te mau ki te reo Māori i ngā whare ako Pākeha. Kia mātua whakaritea kia tika e ngā whare wānanga mō te nui o ngā tauira Māori ka tae ki ngā tomokanga o ēnei whare, me whai rautaki ngā aporei o ngā whare ako nei i ēnei tauira reo Māori e kainamu ana ki ēnei whare wānanga, waihoki, i a rātou e ako ana ki ēnei whare ako.
Te mahi ka mahia e mātou
E rua tau te roa o tēnei kaupapa rangahau. I te tau tuatahi ka wānanga tahi ki ngā tauira Tau 13 i a rātou e kuraina tonu ana i tētahi wharekura e aro pū ana ki a rātou tirohanga, me ō rātou whakaaro mō te hiranga o te mau ki te reo Māori. Hei te tau tuarua ka wānanga anōtia ki ngā tauira taha i a rātou e ako ana i ngā whare wānanga puta noa i Aotearoa.
-
Ngā raraunga
Ka whakamahia te hopu reo me te kāmera kia mau ai ngā hua o ēnei wānanga, ā, mā reira ngā raraunga taketake e waihangatia.
-
Te tātari
Ka tātarihia ā-ariā nei ngā raraunga taketake, arā, ko ngā hua ka puta i ēnei wānanga i te Tau 1 me te Tau 2. Katahi ka whakataurite ai ngā hua o ngā wānanga mai i tā rātou noho tonu i te wharekura, ki tā rātou ako i ngā whare wānanga Pākeha.
